اتنصب عليا في مبلغ محترم على فيسبوك.. هل مباحث الإنترنت بتجيب حق حد؟

يا جماعة الخير أنا محتاجة حد يفيدني عشان أنا دمي محروق بقالي يومين. شفت إعلان ممول على فيسبوك لصفحة بتبيع شاشات وأجهزة بأسعار لقطة، وللأسف صدقتهم وتواصلت معاهم على الواتساب. طلبوا مني أحول نص المبلغ كعربون "جدية حجز" على رقم فودافون كاش عشان الشحن يخرج، وحولت فعلاً حوالي ١٢ ألف جنيه. أول ما الفلوس وصلت، عملولي بلوك من كل حته والصفحة شكلهم غيروا اسمها لأنها اختفت من عندي خالص. أنا معايا اسكرينات للمحادثات، ورقم التليفون اللي حولت عليه، ورسالة التحويل. حد يقولي لو رحت مباحث الإنترنت في العباسية الموضوع هياخد وقت قد إيه؟ وهل فعلاً بيعرفوا يجيبوا النصابين دول ولا العوض على الله؟ أنا مش عايزة أسيب حقي بس في نفس الوقت مش عايزة ألف في دواير فاضية وتوكيلات وقواضي تكلفني أكتر من اللي اتسرق مني. يا ريت لو حد مر بالتجربة دي قريباً أو محامي فاهم في الجرائم الإلكترونية ينصحني أتحرك إزاي وايه الورق اللي آخده معايا، وهل الفلوس دي بترجع أصلا ولا مجرد حبس للمتهم لو اتمسك؟