اشتريت لابتوب مستعمل وصاحبه طلع هكر وبيهددني بصور خاصة أعمل إيه؟

أنا واقع في مشكلة ومحتاج حد يفيدني قانونياً ضروري لأن أعصابي باظت. أنا لسه متخرج من أسبوعين كده اشتريت لابتوب مستعمل من واحد عن طريق جروب على الفيسبوك. الجهاز كان شغال كويس جداً ومفيهوش أي مشكلة، بس من يومين اتفاجئت برسالة جيالي على الواتساب من رقم غريب فيها صور ليا وأنا في الأوضة في وضع خاص جداً! ولما رديت عليه طلع الشخص ده هو اللي باعلي اللاب، وبيقولي إنه كان مسطب برنامج مخفي بيفتح الكاميرا من غير ما اللمبة بتاعتها تنور، وإنه كمان سحب كل الداتا اللي كانت على الموبايل لما وصلته بالجهاز عشان أنقل ملفات. المصيبة دلوقتي إنه بيساومني على مبلغ 30 ألف جنيه، وبيقولي لو مدفعتش خلال 48 ساعة هينشر الصور دي ويبعتها لكل قرايبي وأصحابي على الفيس بوك لأنه كمان سرق الباسوردات بتاعتي. أنا بجد في مصيبة ومش عارف أتصرف، أنا لسه ببدأ حياتي ومش عايز شوشرة أو فضايح، وفي نفس الوقت معيش ربع المبلغ اللي هو طالبه ده. حد يقولي أعمل إيه؟ هل أروح أبلغ مباحث الإنترنت علطول ولا ده هياخد وقت وهو ممكن ينشر الحاجات دي ويفضحني؟ وهل المحادثات اللي بيني وبينه على الواتساب دي تعتبر دليل كافي ضده؟ ياريت حد من المحامين يوجهني أتحرك إزاي من غير ما أأذي نفسي.