نصائح للمحامي الشاب
طالب حقوق في سنة تالتة وحاسس إني تايه وإزاي أبقى محامي شاطر بجد؟
مساء الخير يا أساتذة.. أنا طالب في كلية الحقوق، حالياً في سنة تالتة. الحمد لله بذاكر كويس وبجيب تقديرات معقولة جداً، بس المشكلة إني حاسس إن الدراسة الأكاديمية والنظري اللي بناخده في الكلية في وادي، والواقع العملي وشغل المحاكم في وادي تاني خالص. كل ما أحاول أنزل أتدرب في مكتب محامي في فترة الإجازة، بحس إني أبيض ومش فاهم أي حاجة في الإجراءات العملي. يعني لو انطلب مني حاجة بسيطة زي إني أطلع ورقة من المحكمة أو أصور ملف، بحس إني تايه وسط الزحمة والموظفين ومش عارف أكلم مين ولا أروح فين. زمايلي الأقدم مني دايماً يقولولي "المحاماة ممارسة وشارع مش بس حفظ كتب"، بس أنا بجد مش عارف أبدأ منين صح عشان مأضيعش وقتي وأتأسس صح. كنت حابب أسمع نصيحة من الأساتذة الكبار اللي مروا بالمرحلة دي: إيه الأهم دلوقتي في مرحلتي دي؟ هل أركز أكتر على حفظ القوانين والثغرات وفهم المواد من الكتب؟ ولا أنزل أتبهدل في المحاكم عشان أفهم الشغل الإداري الأول؟ ولو أنا حابب أتخصص في الجنائي بعدين إن شاء الله، إيه المهارات اللي المفروض أشتغل عليها من دلوقتي عشان لما أتخرج أكون جاهز أقف قدام قاضي وأترافع بثقة؟ ياريت تعتبروني أخوكوا الصغير وتدلوني على الطريق، إزاي أستغل السنتين دول عشان أطلع محامي فاهم ومتميز ومش مجرد خريج معاه كارنيه نقابة وخلاص؟ وشكراً جداً ليكم مقدماً.